ഏറെ വര്ഷങ്ങള്ക്ക് മുമ്പ് 'രാമ - ദി പ്രിന്സ് ഓഫ് ലൈറ്റ്' എന്ന അനിമേഷന് ചിത്രം ആസ്വദിച്ച് , തുളസീദാസിന്റെ അനശ്വരമായ കാവ്യത്തില് നിന്ന് കടം കൊണ്ട 'ജനനി മേം രാംദൂത് ഹനുമാന്' എന്ന ഗാനരംഗം കണ്ടു വിസ്മയം കൊണ്ടിരുന്നപ്പോള് മനസ്സില് ഒരീണം ,ഒരു വരി , "രാമദൂതനെന് വഴി കാട്ടണമേ' . അതങ്ങനെ വിടാതെ പിന്തുടര്ന്നപ്പോള് കൂട്ടി കൂട്ടി ഒരു കവിതയാക്കി. അടുപ്പമുള്ളവരെ കാണിച്ചപ്പോഴോ , ഇത് പദ്യമാണോ ഗദ്യമാണോ എന്നായി. എന്റെ മനസ്സിലെ ഈണം പാടി കേള്പ്പിക്കാന് സ്വരവും ശ്രുതിയും ഒന്നും കൂട്ടുമില്ല. മുഴച്ചു നില്ക്കുന്ന ചില വരികളെ ഒന്ന് മെരുക്കാന് ശ്രമിച്ചിട്ട് പറ്റിയുമില്ല. വര്ഷങ്ങള് കടന്നുപോയി. ഇതങ്ങു വിട്ടു പോയില്ല. ഇടയ്ക്കൊക്കെ പുറത്തെടുത്തു ശരിയാക്കാനുള്ള ശ്രമം നടത്തി. ഏതാനും മാസങ്ങള്ക്ക് മുമ്പ് പെട്ടെന്ന് തോന്നി , മെരുങ്ങാത്ത വരികള് കളഞ്ഞാലോ. ചെറുതെങ്കിലും അര്ത്ഥം ഒട്ടും മാറിയില്ല. ഈ രാമായണമാസത്തില് ബ്ലോഗ് ചെയ്യാം എന്ന് വിചാരിച്ചെങ്കിലും ഇപ്പോള് , ഈ അവസാനദിനത്തിലാണ് അവസരം കിട്ടിയത് . ശ്രീരാമഭക്തര്ക്കായി ഈ കുഞ്ഞു സന്ധ്യാനാമം സമര്പ്പിക്കുന്നു.
കാനനമാമെന് മനസ്സില് രാഗദ്വേഷാദികള് നീക്കി
ശാന്തമാം ഉപവനമാക്കണമേ
രാമപാദമെന് മനസ്സില് പതിയണമേ (2)
കഠിനമാം ജീവിതത്താല് കരിങ്കല്ലാം ഹൃദയത്തെ
കനിവോലും കടാക്ഷത്താലലിയിക്കണമേ
രാമരൂപമുള്ക്കണ്ണില് തെളിയണമേ (2)
അവിടുത്തെ പാദത്തില് അഹം തന്നെയര്പ്പിക്കാന്
പവനനന്ദനന് ഗുരുവായ് വരം നല്കണമേ
രാമദൂതനെന് വഴി കാട്ടണമേ (2)
പഥികനാമാത്മാവ് വഴിയമ്പലമൊഴിയുമ്പോള്
ഹരിനാമം യാത്രയില് തുണ നല്കണമേ
രാമനാമമെന് നാവില് വിടരണമേ (2)
English Translation :
May the forest of my mind be turned into a peaceful garden
Without anger and attachment'
May the lotus feet of Rama enter my mind
May his compassionate glance melt the heart
that was hardened by tough life
May the divine form of Rama appear to my inner eye
May Hanuman be my teacher and
help me to surrender myself
May the messenger of Rama show me the way
May the Lord's name be the companion
when the soul-traveller leaves the inn
May the name of Rama stay on my lips
